ابراهيم عبيدى يكتب حلم الغلابه

( حلم الغلابه )
----------------

حلم الغلابه طار لفوق

والشوق بيشلع فى الحلوق

بجناح منبت فى الوهن

--------------------------

حلم الغلابه بيتعجن

بالوهم مع حبة شجت

وبيتقلى فى زيت الزمن

-------------------------

حلم الغلابه بيترسم

فوق بحر تلج ويبتسم

تطلع عليه شمس الوطن

---------------------------

حلم الغلابه بيتخنق

من قبل حتى ما يتخلق

وبيتفرم من غير مكن

----------------------------

حلم الغلابه مركبة

متركبة ومكركبة

زى الجمل من غير رسن

--------------------------

بلعها بحر فى ليل ضلم

يا ريت ما كانشى فى يوم حلم

والصرخة حلم بتندفن

----------------------------

حلم الغلابه سلسلة

متسلسلة ضامة الخلا

شداه لبحر من الحزن

----------------------------

شقيان جعان عريان يخاف

طاب حتى يلقى لقمة حاف

علشان يقاوم فى المحن

----------------------------

فى الصيف بيحلم بالشتا

فى البرد يحلم بالدفا

طول عمره يحلم بالسكن

------------------------

حلم الغلابه تاه فى بير

والبير غويط جواه اسير

مين اللى يقدر عالفتن

---------------------------

لملم جناحك وانكسر

يالا انتشر بيت البشر

لحسن تروح من غير تمن

----------------------------

حلم الغلابه كان فتات

ولما عمر الحلم فات

اتسرق منه الزمن

----------------------------

اندفن حلم الغلابة

لما مات ارنب فى غابة

بس مات ملقاش كفن

-------------------------