إهداء .. فى ذكرى اليوم العالمى لمحو الأمية ......
( عـايزة .. )
-------------
معايا لوحى وطباشيرى وإرادتى ومش حتقـف قـدامى ظــروف
ضحكتى منـورة وشى ومفيش جـوايا قـلق ولا حيـرة ولا خـوف
عـايزة أبقى كيف الخـلق وأتعـلم زيهم بسـرعة كتــابة الحـروف
نفسى أشب من شبـاك الحيـاة وأتفرج بجد ع النـاس وأشـوف
كنت فاكـرة الدنيــا قريبـة من طـرف يـدى لقيتها دروب وعطـوف
قلت العلام حيخلينى زينة وأوعى كده لحالى وسط دى الألوف
عـايزة أكـون غير البنـات اللى حلمهم ما يعـدى أطـراف الكفـوف
نفسى فى دار بالطـوب الأحمر مش بالطين والخشب مسقوف
بـدى ألبس كيـف بنـات البنـدر وأسابق الوِلد على أول الصفـوف
أنا كلى أمـل وبـدى بكره مليـان خيـر جـاى ليا بشـوق الملهوف
خـلاص زهقـت من قـولة يا بـت إغسلى وإكنسى فى الجاروف
مليت من روحى غـادى وخيطـى وألفقـى وأرفى شالى الصوف
بـدى أسمـع حاجة ثانيـة غير بُكـاء النـاى والربابـة ودق الدفـوف
ما فلتش عيـارى كيف ما بيقـولوا ولا فاتنى الخِشـى والكسوف
أنا بس عـايزة أبقى زيكـم أقـرى وأكتـب جُمـل من دى الحـروف
الكاتب : ابراهيم عبيدى
ليست هناك تعليقات:
إرسال تعليق