شعر : ابراهيم عبيدى
-------
الناس بقت خلاص
فاضية والكل ناوى
يتكلم فى السياسه
وعجباه لغة الحكاوى
واللى واخدها جد
واللى بنصاحته غاوى
يحطم فى شبابنا
لجل يشوفوا البلاوى
وكلام عن الغلاء
وألاف من الشكاوى
من ناس عاملين كبار
وكل كلامهم فتاوى
ما عاد حد عاجبهم
الا أصحاب قناوى
اللى هاجروا وسافروا
وجم معاهم بكاوى
واحنا زى ما أحنا
وجنبهم بأيه نساوى
شباب ما نابها حاجة
الا قعاد القهاوى
واللى انحرف طريقة
واللى شايل مطاوى
واللى شايفها سوده
واللى قاعد يداوى
يتحايل على الزمن
وكأنه يا عينى حاوى
ليست هناك تعليقات:
إرسال تعليق