قناة السويس
قصيدة عامية للشاعر ابراهيم عبيدى
**********************
من كام سنة ماتوا جدودى هناك
وقالولى ياابنى إوعى تبص وراك
وقالتلى ياابنى أنا عمرى ما هنساك
أنا القناة الجميلة هكون تملى معاك
**
المصرى حفرها بدمه لجل ينول سعده
ومات هناك الغالى لجل عيون بلده
وابنه كان وياه لجل يكون سنده
ومات حبيبه معاه هو اللى كان ولده
**
وبحيرى ويا صعيدى ماتوا هناك فى الحفر
وقرى كمان وبلاد حتى ولاد الكفر
وكانت إيديهم بتعمل حتى ساعات الصفر
حتى الأيادى كترت كمان وصارت وفر
**
عشنا ليالى جميلة وقناتنا صبحت عروسه
حتى أهالى السويس غنولها ويا العروسه
وهنعيش بجد بكرامة والعدو دا راح ندوسه
يبقى ما عادش خلاص يتحكم فينا بفلوسه
**
وعلى الطريق هنسير ونكمل المشوار
ونحفر قناة جديدة هتعمَّر كل دار
وجيشنا واخدها بجد طبعاً دا مش بهزار
واللى يشارك معانا يبقى من الأحرار
**
المصرى هيفضل مصرى انسان فى كل عصر
وهيحفر القناة لجل عيون مصر
واللى يحاول يعطل يبقى مصيره العصر
وجيشنا حر وجميل هو اللى جاب النصر
ليست هناك تعليقات:
إرسال تعليق