حطة يا بطة
شعر : ابراهيم عبيدى
-------------
حطة يا بطة كفايه أونطة
دى الميه مليانه مجارى
والباشا جنبه ازازتين
يشربهم بالسم الهارى
نفسى يبص مرة علينا
وليه من خيبته علينا يدارى
أن ماسورة المية اتكسرت
واحنا بقالنا سنين بنعانى
نشرب ميه تهرى كليتنا
وتسمع منه يقول وانا مالى
لو مش قادر سيبها لغيرك
ولا انتى واخدتها تسالى
---------
حطة يا بطة أنا مالى ياعم
عمرت خربت ليه اتغم
طلعت نزلت ايه هيفيد
باعو بلدنا بطن حديد
وتشيلنى معاك الهم
شوف مصلحتك أنت ياعم
شاغل نفسك ومحيرها
مهما تقول برده هغيرها
اسكن تربة .... اسكن عشة
أكل لحمة ..... أكل كرشه
ساكن شارع .... أو زنزانه
قلتى فاضية ..... أو مليانه
سبنى لحالى .... أيه هيهم
ماتشيلنى معاك الهم
حطة يا بطة وليه هتغم
-------------
حطة يا بطة تفكر ليه
سيب الفكر قوام للبيه
وخليك عايش انت فى همك
وأن جة باعك ولا يهمك
وأن مالقيت فى اليوم رغفين
انوى صيام على طول ليومين
وأن مالقيت مكان يداريك
أو عشه سكن تأويك
مدد طولك جنب الحيطة
ماهى يابنى بقت زيطة
يملك ارنب ولا جنيه
مش من حقك تسأل ليه
سيب الفكر قوام للبيه
--------------
حطة يا بطة على حتتنا
جابوا الكاميرا فى يوم وشفتنا
وقالوا علينا مساكين
وولاد الحته شاهدين
ووعدونا يشوفوا حالتنا
ويعالجوا تفيدة اللى جارتنا
وكانت حلقة فى التلفاز
وأحنا ننور لمبة جاز
وفضلنا احنا المساكين
جوه حارتنا البور عايشين
حطة يا بطة على الناسين
اللى لخيرنا على طول واكلين
-----------
حاطة يابطة أنا خايف ليه
ولو هتكلم طب أقول أيه
خايف ولا من السجان
يجى ياخدنى ورا القضبان
علشان مرة قلت حرام
ولا كتبت عن البرشام
ولا وصفت بيه مسئول
ولا لعنت اكل الفول
ولا فى مرة قلت يا حقى
أن كان لأحمد ولا لصدقى
ولا مشيت مرة فى مظاهرة
ولا حلفت بستى الطاهرة
لأكشف ستر ولاد الايه
حطة يا بطة وأنا ازعل ليه
--------------
حطة يا بطة كلام فى كلام
وأغانى ولا فى الأفلام
شوف كام مرة جم وعدونا
ولغيرنا همة اللى باعونا
شوف كام نشرة للآخبار
والآسعار هتولع نار
وشوف كام بيه طالع فى الصورة
وكام واحد محشور فى ماسورة
وشوف كام واحد له كام دار
وأسمع منهم أنى حمار
وحطة يا بطة وأيه الفايدة
لسه النار فى الملعب قايدة
بس أنا قلت أنا واد لعيب
يمكن تعلب ..... يمكن ديب ديب
