يا وطن

فضفضة بكاء قلب موجوع على أولاد وطنه على 

الحدود 

( يا وطن .. )

--------------

يا وطن ..

منصاب بالغم والهم !!

هو إحنا مذنبين ..

علشان بنحبك ؟!

ولا إحنا أغبياء ..

صعبان علينا الفهم !!

يا وطن ..

بيجرفوا خير ولاده ..

ويدفنوه فى اليم !!

يا وطن ..

هو مش كفاية ..

كده حصاد الألم ؟!

وإمتى حيتوب ..

علينا زمن العدم ؟!

يا وطن ..

شبعنا فُرقة وخصام ..

وهامتنا محنية كالغنم !!

يا وطن ..

قرفنا من عالم واطية ..

لا بدها تهدى و لا تتلم !!

يا وطن ..

أتشلينا من حكومة ..

تايهة بين الخصم والحكم !!

يار ب ..

تعبنا وزهقنا .

والأمل قرب يضيع ..

فى دنيا كذب وخسة وغشم !!

يارب ..

عايزين من حكامنا ..

شوية عدل و قوة وحسم !!

أكتفينا من ..

لون السواد ..

وبكاء أطفال وأرامل ..

وكرهنا روحنا ..

ولون و ريحة الدم !!!!!!!!

 الكاتب ابراهيم عبيدى

لن تسقط مصـر

( لن تسقط مصـر ... )

-----------مش بخاف ..-----------

مهما حصل ..

من تتـار العار .. 

وخوارج الفتنة ..

وخونة أنجاس ..

بلا شرف أو عهد !!

كل طعنات الغدر والخسة ..

فى ظهـرى ..

لا حتكسرنى ..

ولا حتِحنينى ..

ولا حتخلينى أكِـن وأتهد !!

كل نقطة دم ..

نزفها ولادى الأطهار ..

حتقوى عزيمتى ..

وتُصلب هامتى ..

وتخلينى أقـوى وأشد !!

أنا إنتصار وفخار أكتوبر ..

أنا الروح ..

أنا مصـر أم الدنيا ..

أنا البهية القوية ..

اللى شيدت السد !!

أنا مسلم و مسيحى ..

أنا مصـر المحروسة ..

أنا تاج العزة ..

والحرية والشرف ..

وعيـون المجد !!

ربى الله ..

الحق العدل القوى القادر ..

سبحانه حينصر ..

رجال جيشـى ..

ضد أى خسيس أو وغد !!

طالت أو قصرت ..

دى الحكاية ..

بصوا على التـاريخ ..

يا زبانيـة النار والدم ..

يا أمـوات بلا لحد !!

وشوفوا كام حضارة ..

هضمتها أرضى ..

وكام عدو راح وأندثر ..

وصار أثر ..

بين كل جزر ومد !

يا تتار العصر ..

لن تسقط مصـر ..

ده ولادى بيحبونى ..

مهما كان طعم حياتهم ..

مرار أو شـهد !!

يا تتار العصر ..

لن تسقط مصـر ..

ده ترابى عند ولادى ..

غالى يفدوه ..

بالروح والعرق والجهد !!

يا تتار العصر ..

لن تسقط مصـر ..

هبة النيل ..

مصر القـرآن والانجيل ..

مصر المحبة وسر الخُلد !!

يا تتار العصر ..

لن تسقط مصـر ..

اللى حضنت المسيح ..

وربنـا فى قرآنه ..

إداها الأمان والعهد !!

الكاتب :ابراهيم عبيدى

يعنى إيه شهادة

( شهادة .. وشهيد )

----------------------

يعنى إيه شهادة ..

أهلى وناس طيبين ..

بيقولوا على أبويا شهيد وجدى شهيد !!

وناس وحشة ..

بيقولوا علينا بحمقة وغل أنتم للبيادة عبيد !!

يعنى إيه شهادة ..

ووطنى ما كرمش أبويا ولا جدى ..

ونسيهم حتى فى يوم العيد !!

وبيتنا زى ما هو من أيام جدى ..

ما زادش عليه ولا أى جديد !!

يعنى إيه شهادة ..

ومفيش تقدير للذكرى ..

ولا حتى معاش يليق بأسـرة الشهيد !!

والأيام كلها شبه بعضها ..

وسنين بتعدى ومحدش فينا سعيد !!

يعنى إيه شهادة ..

وإحنا بقينا حتى بنستكتر ..

الضحكة والسـلام على بعضنا بالإيد !!

وفالحين فى الحكاوى والغناوى ..

ومصمصة الشفايف والتنهيد !!

يعنى إيه شهادة ..

والوسية زى ماهى باقية فى ..

عقول بشر عايشين فى حلم السيد !!

واللى نقوله بنعيـده ونزيده ..

ما بنتعبش من كثر النفاق والتمجيد !!

يعنى إيه شهادة ..

رخص المعنى الطاهر فى زمانكم ..

وبقى كله ممكن ومعقول وأكيد !!

واللى يسب ويلعـن فى شهيد ..

ضحى بروحه بيتكرم وينول التأييد !!

يعنى إيه شهادة ..

يا وطن تاهوا فى أساميه ..

ومعظم شعبه بيـدور على رزقه كالمطاريد !!

يا وطن بعناه بكسلنا وتبعيتنا ..

وخضوعنا وبيعنا لإرادتنا وبوس الإيد !!

يعنى إيه شهادة ؟!

يعنى إيه شهيد ؟!

لو حسستونى إننى إنسانة ..

لها حق تحلم ببكره تعيشه بكرامة ..

يبقى ده هو العيد !!

لما أشوف إسم أبويا وجدى ..

على شارع أو ميدان أو مدرسة ..

يبقى ده هو العيد !!

لما أمى تأخذ معاش يكفينا ..

وبسترنا فى الصحة والمرض ..

يبقى ده هو العيد !!

وممكن ساعتها بس ..

أفهـم يا أهل وطـنى ..

يعنى إيه شهادة ويعنى إيه شهيد ؟!

الكاتب : ابراهيم عبيدى

وجودنا في الدنيا اختبار من الله

, واختيار لنا بين الجنة والنار ... الدنيا ليست لهو ومتاع ومعيشة ومستقر للمسلم

إن لم يعجبك شريك حياتك

لا تفكر كيف تتخلص 

منه لكن كيف تتقبله وتتعايش معه

كلما فكرت كيف تتعايش معه وجدت أفكار إيجابية 

تجعلك ترتاح منه أكثر

أصدق حكمه فى الحياة

إذا شعرت أنك لا تعيش جيداً فاعلم أنك لا

 تصلى جيداً

لماذا صبر أيوب

ولماذا خرجت مريم إلى الناس بطفلها

ولم لـم يخاف ابراهيم من النار

ولم يحزن نبينا وصاحبه في الغار